एमसीसी विवादमा दीपकराज गिरीको टिप्पणी : निर्णय सडकबाट हैन, सदनबाटै गर्ने हो

काठमाडौं । अभिनेता दीपकराज गिरी समसामयिक राजनीतिमा आफ्ना दृष्टिकोण राख्छन् । टिभी सिरिज ‘तीतो सत्य’देखि व्यवसायिक हिट फिल्म ‘छक्का पञ्जा’सम्म उनले समाज र राजनीतिलाई कलाको केन्द्रमा राखिरहेका छन् ।

यस्तोमा, अहिले निकै तातिरहेको राष्ट्रिय मुद्दा अमेरिकी अनुदान सम्झौता मिलेनियम च्यालेन्ज कर्पोरेसन (एमसीसी)बारे पनि दीपकले आफ्ना भनाई राखेका छन् । यो मुद्दामा मौनता साँधिरहेका दीपकले शुक्रबार सामाजिक संजालमार्फत एमसीसीबो टिप्पणी गरेका छन् ।

एमसीसीलाई सडकबाट नभई संसदबाट टुंगो लगाउनुपर्ने दीपकको भनाई छ । यो अमेरिकी अनुदान सम्झौतालाई लिएर सडकमा भइरहेका विरोधप्रति उनको असन्तुष्टि रहेको बुझ्न सकिन्छ ।

उनी लेख्छन् : चीन पनि ठीक, अमेरिका पनि ठीक, भारत पनि ठीक, सबै छिमेकी बराबर भन्ने जस्तो । लिंग नखुलेको परराष्ट्र नीतिको दिन गयो अब ।

उनी अघि लेख्छन् : कसैको सह्योग चाहिन्न भन्ने कुरा बेलुका क्वार्टर खाएर भन्ने कुरा हो । राँगाको सुकुटी चपाउँदै दिएको तथ्यहिन राष्ट्रवादी गफलाई त रक्सीले मज्जाले पचाउला तर हाम्रो जस्तो निर्यात शून्य र आयातमा निर्भर भएको भारत परिवेष्ठित मुलुकले भविष्यमा हुने दुर्घटनालाई पचाउन सक्दैन ।’

‘निर्णय सडकबाट होइन, सदनबाटै गर्ने हो’ दीपकको सुझाव छ । जनप्रतिनिधिलाई विश्वास गर्न समेत उनले आग्रह गरेका छन् ।