बाबुराम र भीम रावलमध्ये कसको पीएचडी नक्कली ? आफैं उत्रिए सवाल-जवाफमा

काठमाडौं । अमेरिकी सहायता परियोजना (एमसीसी) लाई लिएर गरेको टिप्पणीले पूर्वप्रधानमन्त्री एवम् जसपा नेता बाबुराम भट्टराई र एमाले नेता भीम रावलबीच जुहारी चलेको छ ।

सोमबार एमसीसीबारे स्मृति पत्र सार्वजनिक गर्दै रावलले बाबुरामले गोप्य एमसीसी सम्झौता गरेको आरोप लगाएपछि बाबुरामले त्यसको जवाफ सामाजिक संजालमा फर्काए ।

उनीहरूबीचको जुहारी अहिले व्यक्तिगत तहमा पुगेको छ । बाबुरामले रावललाई नक्कली विद्यावारिधिको पदवीवाला भएको अरोप लगाएपछि रावलले पनि त्यसको जवाफ दिएका छन् ।

‘यी कणले पीएचडी गरेको भनेर नाउको अगाडि ‘डा.’ पनि झुण्ड्याउँछन्,’ भट्टराईले ट्वीटरमा लेखेका छन्, ‘विद्यावारिधि गर्दा कसैबारे कुनै दाबी गरियो भने त्यसको स्रोत/मिति/स्थान खुलाउनुपर्छ । उनले दाबी गरेजस्तो ‘बाबुरामले गोप्य रूपमा एमसीसी सम्झौता गरेको हो’ भने कहिले, कहाँ, कसरी खुलाउनुपर्दैन ? कि यी नक्कली पीएचडी हुन् ?’

यो पनि पढ्नुस: भीम रावलको आरोप- एमसीसी बाबुरामले सुरू गरेका हुन्, गोप्य साँठगाँठ हुनसक्छ (भिडिओ)

रावलले पनि यो ट्वीटको जवाफ फर्काएका छन् । उक्त ट्वीटमुनि दिएको जवाफमा रावलले पीएचडी सीमापारी (भारत) को हुने गरेको भन्दै आफ्नो नै भट्टराईकै नक्कली हुन सक्ने लेखेका छन् ।

‘बाबुरामजी प्रम हुँदा २०६८ मा चुपचाप एमसीसीसंग पत्राचार गरी टोली गठन गरिएको तथ्य मैले उल्लेख गरेको छु,’ रावलले भनेका छन्, त्यो बेला दलीय सहमतिबाट मात्र त्यस्तो गर्नसकिन्थ्यो तर जानकारीसम्म गराइएन । पीएचडी नक्कली सीमापारी हुने गरेको सधैँ चर्चा हुन्छ, त्रि.वि.वि. बाट पीएचडी कसैको नक्कली हुने चर्चा नै हुन्न ।’