सम्झौता रद्द प्रक्रिया बढेकै दिन बतासले पशुपति विकास कोषलाई बुझायो भाडाबापत एक करोड

काठमाडौं । पर्यटन मन्त्रालयले ठेक्का सम्झौता रद्द गर्ने प्रक्रिया बढेकै दिन बतास अर्गनाइजेशनले पशुपति क्षेत्रभित्रको धर्मशाला लिजमा लिएबापतको एक करोड रुपैयाँ भाडा बुझाएको छ ।

छानविन समितिको सुझाव अनुसार बिनाप्रतिस्पर्धा सेटिङबाट धर्मशाला बतास अर्गनाइजेशनले पाएको भन्दै पर्यटन मन्त्री प्रेम आलेले सम्झौता रद्द गर्ने प्रक्रिया अघि बढाएका छन् ।

सो प्रक्रिया अघि बढेकै दिन धर्मशाला सन्चालक बतास समूहले भने पशुपति क्षेत्र विकास कोषको खातामा एक करोड रुपैया भाडाबापत जम्मा गरेको पाइएको छ ।

८८ लाख ९९ हजार र ११ लाख ५० हजारका अलग अलग भौचरबाट पशुपति विकास कोषको खातामा एक करोड रुपैया जम्मा भएको छ । होटल आनन्द प्रालिले सनराइज बैंकमा रहेको पशुपति विकास कोषको खातामा रकम जम्मा गरेको हो ।

यसैबीच राष्ट्रियसभा निर्वाचनका लागि धनगढीमा रहेका मन्त्री आलेले पशुपति क्षेत्र विकास कोषको खातामा भाडा बापत १ करोड रुपैया आउनु राज्यको लागि फाइदा नै रहेको भन्दै सम्झौता भने रद्द हुने प्रक्रियामा अघि बढेको बताए ।

उनले कानूनविपरितको सम्झौता निरन्तर गर्न नसकिने दावी गरेका छन् । वतास अर्गनाइजेशनले भने कानूनी प्रक्रिया पूरा गरि प्रतिस्पर्धाबाट आफूहरुले सो धर्मशाला सन्चालन गरेको र नियम अनुसारको भाडा गिरेको भन्दै गैरकानूनी रुपमा सम्झौता रद्द भए अदालत जाने बताएको छ ।

मन्त्री आलेले धर्मशालाको स्थलगत अवलोकनपछि छानविन समिति गठन गरेका थिए । समितिले ठेक्का सम्झौता रद्द गर्न सुझाव दिएको थियो ।

अनुगमनका क्रममा सम्झौता बमोजिम धर्मशाला निर्माण नभएको र दररेटमा पनि फरक पारिएको, कोषलाई बुझाउनुपर्ने भाडा नबुझाएको, धर्मशालामा विभिन्न कार्यालय राखेको, कोषको स्वीकृतिबिना धर्मशालामा विभिन्न संरचना निर्माण गर्नेजस्ता कार्य गरेको समितिको ठहर छ ।