विनोद चौधरीविरुद्धको उजुरी खारेज, केन्द्रीय सदस्य बन्न योग्यता पुगेको ठहर – Nepal Press

विनोद चौधरीविरुद्धको उजुरी खारेज, केन्द्रीय सदस्य बन्न योग्यता पुगेको ठहर

काठमाडौं । नेपाली कांग्रेसका केन्द्रीय सदस्य विनोद चौधरीको क्रियाशील सदस्यतासम्बन्धी उजुरी खारेज भएको छ ।

१४ औं महाधिवेशनमा खुल्ला मधेशी केन्द्रीय सदस्यतर्फ छैटौं नम्बरमा रहेर पराजित उम्मेदवार डा. सुभाषचन्द्र यादवले दोस्रो सर्वाधिक मतसहित निर्वाचित केन्द्रीय सदस्य चौधरीको उम्मेदवारी नै विधानविपरीत रहेको भन्दै कांग्रेसको निर्वाचन समितिमा उजुरी दिएका थिए ।

कांग्रेसको केन्द्रीय निर्वाचन समितिले गत पुस ३० गते सो उजुरी उपर निर्णय गर्दै दाबी नपुग्ने ठहर गरेको हो । समितिको निर्णयमा संयोजक गोपालकृष्ण घिमिरेसहित सबै सदस्यहरुको हस्ताक्षर रहेको छ ।

‘नेपाली कांग्रेस केन्द्रीय कार्यसमितिको सदस्य मधेशी खुल्ला पाँच पदका लागि भएको निर्वाचनमा २३ जना उम्मेदवारमध्ये निर्वाचित भएका ५ जनापछि छैटौ बढी मत प्राप्त गरी निर्वाचित हुन नसकेका उम्मेदवार डा. सुभाषचन्द्र यादवको उजुरी केन्द्रीय निर्वाचन समितिले तोकेको समय सीमाभित्र पर्न नआएको र निर्वाचनको सम्पूर्ण परिणाम सार्वजनिक भइ निज विनोदकुमार चौधरी निर्वाचित भएपश्चात निवेदकको उजुरी परेकोले निवेदकको उजुरी उपर कुनै निर्णय गरिरहनुपर्ने देखिएन । उजुरी खारेज हुने ठहर्छ’, निर्वाचन समितिको निर्णयमा उल्लेख छ ।

समितिले कांग्रेस विधान र निर्वाचन निर्देशिकाअनुसार क्रियाशील सदस्यताको निरन्तरताको अवधि प्रमाणित गर्ने वैधानिक अधिकार कांग्रेस केन्द्रीय कार्यालयका मुख्यसचिवलाई रहेको र मुख्यसचिवले २०७८ मंसिर २४ मै चौधरीको सदस्यताको अवधी र योग्यता पुग्ने प्रमाणित गरेको समेत स्पष्ट पारेको छ ।

प्रतिनिधिसभा सदस्यसमेत रहेका चौधरी १४ औं महाधिवेशनमा खुल्ला मधेशी केन्द्रीय सदस्यतर्फ निर्वाचित हुने ५ जनामध्ये दोस्रो सर्वाधिक मत ल्याएर विजयी भएका थिए ।

प्रतिक्रिया

One thought on “विनोद चौधरीविरुद्धको उजुरी खारेज, केन्द्रीय सदस्य बन्न योग्यता पुगेको ठहर

  1. पैसा भएपछि अहिले आएर वहाँकाे पहिल्यैदेखि सदस्यता थियाे भन्दिए भै गयाे नि । फेरि यस्ता कमाउ धन्दावाल जता कमाउन पाईन्छ त्यतै जान्छन् । हिजाे एमाले, आज काँग्रेस, भाेलि माओवादी ।

Leave a Reply

Your email address will not be published.

सम्बन्धित खवर