अनमोलको ‘एक्स-नाइन’ सुटिङ कोरोनाले रोकियो, ‘पारस’को सुटिङ अघि बढाउँदै भुवन

काठमाडौं । अनमोल केसी लगायतका कलाकारले अभिनय गर्ने भनिएको फिल्म ‘एक्स नाइन’ तत्काल निर्माण नहुने भएको छ । फेब्रुअरी महिनाको अन्त्यबाट फिल्म सुटिङ हुने पूर्वनिर्धारित योजना पछि धकेलिएको हो ।

नेपाल प्रेससँग कुरा गर्दै निर्देशक मुकुन्द भट्टले कोरोनाभाइरस महामारीको तेस्रो लहरको कारण फिल्म सुटिङ योजनामा धक्का पुगेको बताए । निर्देशक भट्टले सुटिङ पोस्टपोन्डबारेको जानकारी कलाकारलाई गराइसकेका छन् ।

अनमोलसहित सौगात मल्ल, पुष्प खड्का, राज कट्वालको फिल्ममा मुख्य भूमिका हुने जनाइएको छ । फिल्म छायांकन फेब्रुअरीदेखि हुने भनेरै वर्कसपदेखि शारीरिक सुगठनको काम समेत भैरहेको थियो ।

बलिउड अभिनेता सुनिल सेठ्ठीले पनि यसमा अभिनय गर्ने चर्चा थियो । फिल्मकै लागि भनेर कलाकारले ३ महिनादेखि शारीरिक सुगठन गराउँदै थिए । यसकै लागि भनेर अनमोल केसीले जुँगा पालेका थिए तर, अहिले जुँगा फालिसकेका छन् ।

एक्स नाइन तत्काल निर्माण नहुने भएपछि निर्माता भुवन केसीले होमप्रोडक्सन फिल्म पारस छायांकन फागुनदेखि सुरु हुने बताएका छन् । यतिबेला भुवन पारसकै सुटिङ तयारीमा छन् । तरपनि यी सबै योजना भाइरसको तेस्रो लहरमा निर्भर हुनेछ ।