संक्रमणदर २७ प्रतिशत पुग्यो : १० दिनमै १३०० प्रतिशतले कोरोना संक्रमण

काठमाडौं । ओमिक्रोन भेरिएन्ट पुष्टि भएपछि मुलुकमा कोरोना संक्रमण तीव्ररुपमा फैलिएको छ । पहिल्लो १० दिनमा नेपालमा भाइरस संक्रमण १३०० प्रतिशतले बढेको छ । स्वास्थ्य तथा जनसंख्या मन्त्रालयका अनुसार पुस १८ गते नेपालमा २१६ जना संक्रमित पुष्टि भएका थिए । त्यसपछि १९ गते ३२६ जनामा संक्रमण पुष्टि भएको थियो।

यसअघि लामो समय दैनिक संक्रमित संख्या २०० देखि ३०० वरपर थियो । २० गतेदेखि संक्रमितको संख्यामा तीव्ररुपमा वृद्धि भएको छ । २० गते ३९३ जना संक्रमित थपिएका थिए । २१ गते ४३५, २२ गते ५४०, २३ गते ९६८ जना थपिए।

आज २८ गते मुलुकभर ३०७५ जनामा संक्रमण पुष्टि भएको मन्त्रालयले जनाएको छ । १० दिनअघिको भन्दा २८५९ बढेको छ । यो हेर्दा १० दिनमा नेपालमा कोरोना संक्रमण करिब १३०० प्रतिशतले बढेको छ।

स्वास्थ्य मन्त्रालयको विवरण अनुसार १० दिनअघि पीसीआर परीक्षणमा पोजेटिभ रिपोर्ट देखिनेदर ३.६ प्रतिशत मात्रै थियो।

पछिल्लो २४ घण्टाको पीसीआर परीक्षणमा पोजेटिभ रिपोर्ट आउने दर २७ प्रतिशत रहेको प्रवक्ता संगीता कौशल मिश्राले बताएकी छिन् । बढेका संक्रमितमा पनि ५० प्रतिशत भन्दा बढी काठमाडौं उपत्यकामा मात्रै छन् । पछिल्लो २४ घण्टामा ३०७५ संक्रमित थपिएकोमा १५३८ संक्रमित काठमाडौं उपत्यकामा थपिएका छन्।