छोरीबाट पत्रकार बस्नेतको ‘महाभारा’ लोकार्पण

काठमाडौं। पत्रकार बसन्त बस्नेतको उपन्यास ‘महाभारा’ लोकार्पण भएको छ। शनिबार काठमाडौंको बौद्धस्थित तारागाउँ म्युजियममा उपन्यासको लोकार्पण  भयो।

बस्नेतकी छोरी अनुदिताले पुस्तकको लोकार्पण गरिन्। त्यसअघि उपन्यासले ओगटेको भेगका उपेन्द्र सुब्बाले पुस्तकबारे टिप्पणी गरेका थिए।

लेखक बस्नेतसँग पत्रकार एवं लेखक शिवानीसिंह थारुले संवाद गरेकी थिइन्। संवादमा पुस्तक लेखनदेखि यसका पात्रहरूको मनोविज्ञान, लिम्बू लबज तथा उपन्यासको विषयवस्तुसम्म चर्चा भएको थियो।

बस्नेतले पुस्तकबारे केही विषय आफैं प्रष्ट्याउने कोसिस गरे भने केही पुस्तक पढेपछि आफैं प्रष्ट हुँदै जाने जवाफ दिएका थिए। उपन्यासको कथा पूर्वी पहाडमा उम्रिएको प्रेम र त्यससँगै टकराउन आएका राजनीति र धर्मबीचको द्वन्द्व सम्बन्ध रहेको बताइएको छ।

कार्यक्रममा गायिका झुमा लिम्बू र उनको रैथाने समूह, कवि नवराज पराजुली र लोचन रिजालल लगायतको प्रस्तुति थियाे ।