इन्दुज भ्याली फिल्म फेस्टिभलमा ‘बुलबुल’लाई तीन र ‘सरितालाई दुई अवार्ड

काठमाडौँ । स्वस्तिमा खड्का र मुकुन भुषालको मुख्य भूमिका रहेको सोसल ड्रामा फिल्म ‘बुलबुल’ले दक्षिण एसियाली घुम्ती फिल्म फेस्टिभल (इन्दुज भ्याली इन्टरनेसनल फिल्म फेस्टिभल)मा तीन अवार्ड जितेको छ । तीनवर्षअघि प्रदर्शनमा आएको विनोद पौडेल निर्देशित फिल्मले निर्देशन, अभिनेता र अभिनेत्री विधामा जित हासिल गरेको हो ।

निर्देशकको रुपमा विनोद पौडेलले अवार्ड जिते भने फिल्मबाट स्वस्तिमा खड्का र मुकुन भुसालले क्रमशः उत्कृष्ट अभिनेता र अभिनेत्रीको अवार्ड जिते ।अनलाइन चलेको फेस्टिभलमा नेपालबाट सहभागी भएको इटलियन फिल्म ‘सरिता’ले पनि दुई अवार्ड जित्यो ।

फिल्म सरिताले कोरियोग्राफी र पटकथा विधामा दुई अवार्ड जितेको हो । यो फिल्मलाई सर्जियो बास्सोले निर्देशन गरेका हुन् । फिल्मको छायांकन भने रविन आचार्यले गरेका हुन् । साउथ एसियाका विभिन्न सहरमा आयोजना गर्ने लक्ष्यसहित सन् २०१९मा सुरु भएको यो फेस्टिभल काठमाडौँमा पनि आयोजना गर्ने आयोजकको तयारी छ ।