हारेका जिल्ला सभापतिकाे गाउँमा जितेका केन्द्रीय सदस्य बहिस्कार !

रूपन्देही । नेपाली कांग्रेसको संस्थापन इतर समूहबाट केन्द्रीय सदस्य निर्वाचित भएका डा. गोविन्दराज पोखरेल जिल्लाकाे नाैबहिनी गाउँपालिकामा अमान्य भएका छन् ।

नौबहिनी गाउँपालिका प्यूठानमा कांग्रेसले उनलाई बहिष्कार गर्ने निर्णय लिएको छ ।

नेपाली कांग्रेस नौबहिनी गाउँपालिकाको शुक्रवार बसेको बैठकले यस्तो निर्णय लिएको हो ।

जिल्ला अधिवेशनमा भएको झडपपछि कार्यकर्तालाई आतंककारीको संज्ञा दिएको, घाइते कार्यकर्ताको अस्पतालमा उपचार भइरहँदा मुकदर्शक बनिरहेको र झडपमा परी घाइते भएका कांग्रेसकै कार्यकर्तालाई सहानूभुति दिन नदिएको आरोप पोखरेलमाथि लगाइएको छ ।

उनलाई गाउँपालिका क्षेत्रमा हुने कार्यक्रममा उपस्थित हुन नदिने गरी बहिष्कार गर्ने संस्थागत निर्णय भएको कांग्रेस नौबहिनी गाउँपालिकाका पार्टी सभापति देविराम पुनमगरले जानकारी दिए ।

पोखरेल कांग्रेसकै हालै सम्पन्न महाधिवेशनबाट केन्द्रीय सदस्य भएका थिए । उनी यसअघिको निर्वाचनमा प्यूठानबाट प्रतिनिधिसभा सदस्यमा समेत उम्मेदवार थिए ।

नौबहिनी गाउँपालिका काँग्रेसको जिल्ला सभापतिमा पराजित शिव रिजालको क्षेत्र हो । पोखरेल भने ऐरावती गाउँपालिका बासिन्दा हुन् ।