नायिका अदिती बुढाथोकीलाई कोरोना संक्रमण : लक्षण देखिएपछि आइसोलेसनमा

मुम्बई । कोरोनाभाइरसविरुद्ध पूर्ण मात्रा खोप लगाइसकेकी अभिनेत्री अदिती बुढाथोकीलाई संक्रमण भएको छ । इन्स्टाग्राम स्टोरीमार्फत अदितीले आफूलाई भाइरस संक्रमण पुष्टि भएको जनाएकी छिन् ।

हल्का लक्षण देखिएपछि आइसोलेसनमा रहेको उल्लेख गर्दै उनले आफ्नो सम्पर्कमा आएकालाई पनि परीक्षण गराउन आग्रह गरेकी छिन् । अहिले मुम्बइमै रहेकी उनले यसअघि कोरोनाविरुद्ध कोभिसिल्ड खोप लगाइसकेकी छिन् ।

मंसिर दोस्रो साता सिक्किममा फिल्म बाबरी छायांकनपछि अदिती केही म्युजिक भिडिओ र विज्ञापन प्रोजेक्टको लागि भन्दै मुम्बई पुगेकी थिइन् । कोरोनाभाइरसको नयाँ भेरिएन्ट ओमिक्रोन संक्रमण फैलिएपछि आजदेखि मुम्बइमा सफ्ट लकडाउन सुरु भएको छ ।

शनिबार भारतमा २२ हजार ७७५ वटा कोरोनाका नयाँ संक्रमित भेटिएका छन् । गतसाता भन्दा यो संक्रमण संख्या २१६ प्रतिशतले उच्च रहेको जनाइएको छ ।