सन्दीपलाई दासानायकेको समर्थन, कप्तानीमा सफल हुने विश्वास

काठमाडौं । नेपाली राष्ट्रिय क्रिकेट टिमका प्रशिक्षक पुबुदु दासानायेकेले नवनियुक्त कप्तान सन्दीप लामिछानेको प्रशंसा गरेका छन् । सन्दीप कप्तानको भूमिकामा सफल हुने आशा उनले व्यक्त गरे ।

नेपाल क्रिकेट संघले ज्ञानेन्द्र मल्ललाई कप्तानबाट हटाउँदै सन्दीपलाई नयाँ कप्तान नियुक्त गरेदेखि तीव्र विवाद उत्पन्न भएको छ । क्रिकेट खेलाडीहरुले क्यानको निर्णय फिर्ता हुनुपर्ने माग गरेका छन् । क्यानमाथि राजनीतक दबाब पनि छ । तर, दासानायेकेले भने कप्तान परिवर्तनको निर्णयलाई स्वभाविक मानेका छन् ।

आज आयोजित पत्रकार सम्मेलनमा उनले यो विषय क्रिकेट बोर्डकै भएको भन्दै आफूले हस्तक्षेप नगर्ने बताए । सन्दीप कप्ताानका लागि योग्य रहेको टिप्पणी समेत उनले गरे । स्मरणीय छ कि सन्दीपलाई नेपालको राष्ट्रिय टिममा स्थापित गराउन मुख्य भूमिका दासानायकेले नै खेलेका थिए ।

पात्रकार सम्मेलनमा दासानायेकले सन्दीपको खुलेर प्रशंसा गरेका थिए । एसोसिएट राष्ट्रहरुमा सन्दीप जति ‘क्यालिबार’ भएको अर्को खेलाडी नरहेको उनको भनाइ थियो ।

सन्दीपले अन्डर १९ तथा फ्रेन्चाइज लिग इपीएलमा कप्तानी गरिसकेको उनले सम्झिए ।

उनले भने, ‘सन्दीपले विभिन्न देशका लिगहरुमा उच्चस्तरको क्रिकेट खेलिरहेका छन् । संसारका उत्कृष्ट खेलाडीहरुसँग काँधमा काँध मिलाएर खेल्न सक्नु चानचुने कुरा होइन ।

तर, पनि उनीसँग राष्ट्रिय टिमका कप्तानका रूपमा उनको टेस्ट हुने छ । उनका अगाडि धेरै चुनौती छन् । मलाई विश्वास छ, पछिल्लो ३-४ वर्षमा गरेको प्रगतिलाई हेर्दा उनी कप्तानी भूमिकामा पनि धेरै सफल हुन सक्छन् ।