राष्ट्रियताको नाममा जनतालाई दास बनाउन पाइँदैन : नेपाल (भिडि‌ओ)

काठमाडौं । नेकपा एकीकृत समाजवादीका अध्यक्ष एवं पूर्व प्रधानमन्त्री माधवकुमार नेपालले राष्ट्रियताको नाममा वंश वा व्यक्तिको दास बन्ने कुरा स्वीकार नहुने बताएका छन् ।

नेकपा माओवादी केन्द्रको आठौं महाधिवेशनमा शुभकामना मन्तव्य दिँदै नेपालले राष्ट्रियताका सन्दर्भमा जुनसुकै विचार बोकेपनि सहकार्य हुने बताए ।

‘राष्ट्रियताको कुरा हो भने सबै दलहरुको एकता अवश्य हुन्छ । तर राष्ट्रियताका नाममा जनतालाई दास बनाउने कुरा स्वीकार्य हुन सक्दैन । कुनै एउटा व्यक्ति वा वंशको दासत्व जनताले स्वीकार गर्दैनन् । त्यसविरुद्ध लडेर लोकतन्त्र सुदृढ बनाउनुपर्छ’, नेपालले भने ।

उनले राजनीतिक दलहरुको अगुवाईमा राजनीतिक क्रान्तिको काम सम्पन्न भइसकेको बताए । गण्तन्त्र र संघीयतासहितको संविधानको रक्षा गरेर जनतालाई सुशासन दिनुपर्नेमा नेता नेपालको जोड रहेको थियो ।

‘हामीले राजनीतिक क्रान्ति पूरा गरेका छौं । जनतालाई अब सुशासन दिनुपर्नेछ । त्यसका लागि भ्रष्टाचारलाई निमिट्यान्न पार्नुपर्छ’, नेपालले भने ।

उनले नेपालमा वामपन्थी विचारप्रति जनताको आकर्षण बढ्दै गएको भन्दै वास्तविक कम्युनिष्ट पार्टीलाई जनताले विश्वास गर्ने बताए ।