स्थान अभावले भुइँमै बसेर माओवादी केन्द्रीय समितिको अन्तिम बैठक (तस्बिरहरु)

काठमाडौं । राष्ट्रिय महाधिवेशनअघि नेकपा (माओवादी केन्द्र)को अन्तिम बैठक अहिले केन्द्रीय कार्यालय पेरिसडाँडामा बसिरहेको छ ।

केन्द्रीय कार्यालयको सभाहलमा स्थान अभाव भएपछि केन्द्रीय सदस्यहरुलाई भुइँमै म्याट विछ्याएर बस्ने व्यवस्था मिलाइएको छ ।

आज दिउँसो ३ बजे प्रज्ञा भवनमा माओवादीको राष्ट्रिय महाधिवेशन सुरु हुँदैछ । महाधिवेशनले नयाँ केन्द्रीय कार्यसमिति चयन गर्नेछ ।

महाधिवेशनको तयारीमा केन्द्रित रहेर आज अन्तिम बैठक बोलाइएको छ । बैठकमा अध्यक्ष प्रचन्डसहित शीर्ष नेताहरु कुर्सीमा बसेका छन् भने अन्य केन्द्रीय सदस्यहरु भुइ्ँमा छन् ।

माओवादीले राष्ट्रिय सम्मेलनको रुपमा प्रचार गरे पनि हिजोको स्थायी समिति बैठकले महाधिवेशनको नाम दिने निर्णय गरेको थियो । त्यसलाई आज केन्द्रीय समितिले अनुमोदन गर्ने कार्यतालिका छ ।