देउवाले दिए पौडेल र सिंहलाई भाग, शेखरलाई सोधेनन्

काठमाडौं । नेपाली कांग्रेसका सभापति शेरबहादुर देउवाले वागमती प्रदेशको मन्त्रिपरिषद् विस्तारका क्रममा वरिष्ठ नेता रामचन्द्र पौडेल र पूर्वमहामन्त्री प्रकाशमान सिंहलाई भाग दिएका छन् ।

शुक्रबार वागमती प्रदेशको मन्त्रिपरिषद विस्तार हुँदा १४ औं महाधिवेशनमा निर्वाचन प्रक्रियामा सहभागी नभएका पौडेल र दोस्रो चरणमा देउवालाई सघाएका सिंहले १–१ जना मन्त्री पाएका हुन् । पौडेलको सिफारिसमा चितवनका बलराम पौडेललाई भूमि व्यवस्थामन्त्री बनाइएको हो । त्यस्तै सिंहको सिफारिसमा उनकै निर्वाचन क्षेत्र अन्तर्गतको प्रदेशसभा क्षेत्रबाट निर्वाचित दीपेन्द्र श्रेष्ठलाई संस्कृति तथा पर्यटनमन्त्री बनाइएको छ ।

मुख्यमन्त्री राजेन्द्रप्रसाद पाण्डेले शुक्रबार कांग्रेसबाट ३ जनालाई मन्त्री र ३ जनालाई राज्यमन्त्रीको जिम्मेवारी दिएका थिए । कांग्रेसबाट सभापति देउवानिकट चितवनका मिलनबाबु श्रेष्ठ उद्योग वाणिज्य मन्त्री बनेका छन् ।

वागमतीमा प्रदेश सरकार विस्तारका क्रममा पौडेल र सिंहलाई भाग दिइएपनि महाधिवेशनमा निकटतम प्रतिस्पर्धी रहेका डा।शेखर कोइराला पक्षसँग भने देउवाले परामर्श गरेनन् । कोइरालाले सभापतिमा ४० प्रतिशत मत पाएका थिए । कोइराला पक्षले पार्टीभित्र भागबण्डा नखोज्ने बताउँदै आएको छ ।