करोड क्लबमा प्रकाश दूतराजको ह्याट्रिक : ‘जाम भो माइली’लाई पनि करोड पटक हेरियो

काठमाडौं । प्रकाश दूतराजद्वारा संगीतबद्ध ‘जाम भो माइली’ करोड क्लबमा प्रवेश गरेको छ । यसअघि उनका दुई गीत ‘बैनी झ्यालैमा’ र ‘घर कता हो बैनीको’लाई पनि युट्युवमा करोड पटक हेरिएको छ ।

यो समाचार तयार पार्दासम्म शुक्रबार २ बजेसम्म जाम भो माइली गीतको कूल भ्यूज १ करोड २० हजार छ । टीकटकजस्ता सामाजिक संजालको कारण गीतको लोकप्रियतामा वृद्धि भएको मूल्यांकन गरिएको छ ।

शान्तिश्री परियारसँग मिलेर प्रकाशले यो गीत गाएका हुन् । उनकै शब्द र संगीत यस गीतमा छ । दुईवर्षअघि रिलिज भएको उनकै ‘बहिनी झ्यालैमा’ १ करोड ४ लाख भन्दा बढी पटक हेरिएको छ ।

अप्रिल २०, २०२१ मा रिलिज भएको ‘घर कता हो बैनीको’लाई १ करोड ४१ लाखभन्दा बढी पटक हेरिएको छ । तीनवटै गीत करोड क्लबमा प्रवेश गरेपछि नेपाल प्रेससँग कुरा गर्दै दूतराजले नेपाल प्रेससँग भने, ‘एकदमै खुशि छु । मिहेनतको फल मिलेको छ । चर्चा र भाइरलभन्दा पनि गुणस्तरको लागि गाएको हुँ ।’

म्याग्दी घर भएका दूतराजले विदेश जानको लागि दलाललाई खुवाउन पैसा नभएपछि संगीततर्फ लागेको र संगीतले आफ्नो बाटो मोडिदिएको बताएका थिए ।