मनोजमणि आचार्य : ३६ औं नम्बरमा रोकिएका ‘रोल्पाली कांग्रेस’

काठमाडौं । नेपाली कांग्रेसका युवा नेता मनोजमणि आचार्यका लागि १४ औं महाधिवेशन बिर्सन लायक रह्यो । नेपाल विद्यार्थी संघको राजनीतिमा ख्याति कमाएका आचार्य खुल्ला तर्फको केन्द्रीय सदस्यमा निर्वाचित हुन सकेनन् ।

निर्वाचनमा हारजित सामान्य विषय हो तर उनका लागि यो परिणाम अलिक दुःखद हुनेछ । किनकी ३५ जना निर्वाचित हुने खुल्ला केन्द्रीय सदस्यमा उनी ३६ औं नम्बरमा परेका छन् । १ हजार ६ सय ५४ मत पाएका आचार्यभन्दा अघि कृष्णकिशोर घिमिरे रहे ।

३५ औं नम्बरका घिमिरेले १ हजार ७ सय ७ मत ल्याएका छन् । जुन मनोजमणिको भन्दा ५३ मतले बढी हो । नेपाल विद्यार्थी संघको अध्यक्षमा नैनसिंह महरसँग पराजित भएपछि मनोजमणिले देखाएको व्यवहारले उनलाई शालीन र उच्च संस्कार भएका युवा नेताको रुपमा परिचित गराएको थियो ।

कांग्रेस केन्द्रीय समितिमा व्यापारी, निर्माण व्यवासायीदेखि ‘डन’ सम्मले अवसर पाउँदा रोल्पाको विकट गाउँबाट नेविसंघको राजनीतिमार्फत उदाएका मनोजमणि नअट्नुले धेरै कांग्रेसजनलाई निराश बनाएको प्रतिक्रिया सामाजिक सञ्जालमा भेटिन्छ ।