सिटौलाको घर पुगेर विश्वप्रकाशले लिए आशीर्वाद

काठमाडौं । नेपाली कांग्रेसका नवनिर्वाचित महामन्त्री विश्वप्रकाश शर्माले पूर्वमहामन्त्री कृष्णप्रसाद सिटौलासँग भेटेर आशीर्वाद लिएका छन् ।

लामो समयदेखि तिक्ततापूर्ण सम्बन्ध रहेको भनिएका सिटौलालाई भेट्न शर्मा निवासमै पुगेका थिए । चण्डोलस्थित सिटौला निवासको आँगनमा सिटौलाले शर्मालाई खादा र अबिर लगाइदिएर शुभकामना दिए । सो क्रममा सिटौलाले सफल कार्यकालको शुभकामना दिए ।

कांग्रेसको आन्तरिक राजनीतिमा सिटौला-शर्मा सम्बन्ध सुमधुर छैन । सिटौलाकै कारण शर्माले सुशिल कोइराला नेतृत्वको टिम छाड्न बाध्य भएको बताइन्छ । १४ औं महाधिवेशनमा शर्मालाई रोक्नकै लागि सिटौलाले शेरबहादुर देउवासँग सहमति गरेपछि शर्मा प्रकाशमान सिंहको प्यानलबाट उम्मेदवार बनेका थिए ।

महामन्त्रीमा निर्वाचित भएपछि शर्माले सिनियर नेताहरुलाई भेटेर आशीर्वाद लिइरहेका छन् ।