‘प्रेमगीत ३’ मा बलिउडका ए-लिस्टरको टीमअप : राहत फतेह, पलक मुछालदेखि अंकित तिवारीसम्मले गाए गीत

काठमाडौं । नेपाली फिल्म प्रेमगीतको तेस्रो सिक्वेल आगामी फागुन १३ गते मुलुकभर प्रदर्शन हुँदैछ । कोरोनाभाइरस महामारीको कारण ढिलिएको फिल्मको रिलिज अन्ततः हुन लागेको हो ।

रिलिजमा ढिलाइ भएपनि फिल्मको अन्तर्राष्ट्रिय बजार प्रवद्र्धनमा भने फाइदा पुगेको छ । यो फिल्मको भारतको वितरण अधिकार इम्पोसिबल नामक भारतीय कम्पनीले लिएको छ ।

फिल्म निर्माण कम्पनी आसुसेन फिल्म्सले बुधबार विज्ञप्ति जारी गर्दै हिन्दी संस्करणको पोस्ट-प्रोडक्सन करिब अन्तिम चरणमा पुगेको जनाएको छ । हिन्दी संस्करणको सांगीतिक कार्य सकिएको निर्माता सन्तोष सेनले बताएका छन् ।

फिल्मका मुख्य तीनवटा गीतमा बलिउडका चर्चित सांगीतिक हस्तीले साथ दिएको जनाइएको छ । राहत फतेहले ‘ए सनम तुही तु’, अंकित तिवारी र पलक मुछालले ‘तुम प्यार हो’मा स्वर दिएका छन् ।

डान्स नम्बर ‘मुझमे बस जनामा’ देव नेगी र पलक मुछालले गाएका छन् । यो ट्रयाकलाई कुमार र एम तुराजले लेखेका हुन् । ‘हिन्दी संस्करणको सबै गीतको काम सकिएको छ’ प्रेषित विज्ञप्तिमा जनाइएको छ ।

प्रदीप खड्का, क्रिस्टिना गुरुङ, सुनिल थापा र शिव श्रेष्ठको मुख्य भूमिका रहेको फिल्मलाई सन्तोष सेन र छेतेन गुरुङले निर्देशन गरेका हुन् ।