करन जोहरको पार्टीबाट फैलियो बलिउडमा कोरोना : करिनासहितका चार नायिका संक्रमित

मुम्बई । बलिउड फिल्म निर्माता करण जोहरले गतसाता आयोजना गरेको सेलेव्रिटी पार्टीबाट कोरोनाभाइरस फैलिएको पुष्टि भएको छ । सो पार्टीमा सहभागि अभिनेत्री करिना कपुर, अमृता अरोरासहितका कलाकारमा भाइरस संक्रमण पुष्टि भएको छ ।

सो पार्टीमा पुगेका अन्य दुई अभिनेत्रीहरु महीप कपुर र सीमा खानले पनि आफूहरु पोजेटिभ भएको बताएका छन् । संक्रमित सबैलाई खोकी, थकान र हल्का ज्वरो देखिएको जनाइएको छ ।

करिना कपुरसहितका संक्रमित अभिनेत्रीहरुले आफूहरुलाई भाइरस पुष्टि भएसँगै आइसोलेट तुल्याएको उल्लेख गरेका छन् । संजय कपुरकी पत्नी महिपले आफ्नो सम्पर्कमा आएका सबैलाई कोरोना परीक्षण गर्न आग्रह गरेकी छिन् ।

भारतीय संचारमाध्यमका अनुसार बृहमुम्बइ म्युनिसिपल कर्पोरेसन (बीएमसी)ले करिनाको घरलाई सिल गरिदिएको छ । बीएमसीले करिना र अमृताको सम्पर्कमा आएका सबैलाई कोरोना परीक्षण गराउन भनेको छ ।

करण जोहरको पार्टीमा पुगेका सबैलाई सम्पर्क पहिचान गरिएको छ । डिसेम्बर ७ मा करिनाले आफ्ना गर्ल ग्याङको साथ पार्टी आयोजना गरेकी थिइन् । अनिल कपुरकी छोरी रियाको बर्थडे सेलिव्रेसनमा पनि उनी पुगेकी थिइन् जसमा करिश्मा कपुर, मलाइका अरोरा, अर्जुन कपुर पनि सहभागि थिए ।

पछिल्लो समय भारतको महाराष्ट्रमा कोरोनाभाइरको नयाँ भेरिएन्ट ओमिक्रोन संक्रमणको जोखिम बढेको छ ।