ब्यान्ड च्याम्पियन रियालिटी सो हुँदै : टाइटल विजेतालाई २० लाख, रविन तामाङ निर्णायकमा
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/12/band-champion-robin-tamang-home.jpg)
काठमाडौं । नेपालमा पहिलोपटक ब्यान्ड च्याम्पियन रियालिटी सो आयोजना हुने भएको छ । बिहीबारदेखि काठमाडौंको बनस्थलीमा भौतिकरुपमा अडिसन सुरु हुँदैछ ।
पछिल्लो समय कलाका विभिन्न आयाममा केन्द्रित रहेर टेलिभिजन रियालिटी सो संचालन भैरहेको बेला ब्यान्डको प्रतिस्पर्धालाई लिएर यस्तो खाले रियालिटी सो हुन लागेको हो ।
लास्ट फ्राइडे इभेन्ट म्यानेजमेन्ट कम्पनी आयोजकको रुपमा रहेको छ । नेपाली रक गायक रविन तामाङ, ड्रमर देव राना र गिटार माएस्ट्रोका ज्योति घिमिरे निर्णायकको रुपमा छन् ।
माघ १ गतेदेखि एपीवान टेलिभिजनबाट सो प्रसारण हुने जनाइएको छ । ‘ब्यान्डको क्षमता अभिवृद्धि गर्नपनि यो सोले सहयोग गर्नेछ’ नेपाल प्रेससँग आयोजक संस्था लास्ट फ्राइडे इभेन्टका अध्यक्ष श्रीदेव कार्कीले भने ।
सोमा पहिलो हुनेले २० लाख रुपैयाँ पुरस्कार प्राप्त गर्नेछ । टाइटल विजेताले सात मुलुकमा प्रस्तुति दिने मौका पाउनेछ । फस्ट रनरअपले ६ लाख पाउनेछ । सेकेन्ड र थर्ड रनरअपले ४–४ लाख रुपैयाँ पाउने भएका छन् ।