सभापति छान्दै पौडेल पक्ष, पदाधिकारी छान्दै देउवा पक्ष

काठमाडौं । नेपाली कांग्रेसको १४ औं महाधिवेशन सुरु हुन २ दिनमात्रै बाँकी रहँदा सभापति तथा पदाधिकारीका प्रत्याशीहरु समूह व्यवस्थापनमा केन्द्रित भएका छन् ।

दोस्रो कार्यकालका लागि सभापतिको उम्मेदवार बन्ने घोषणा गरेका प्रधानमन्त्री शेरबहादुर देउवाले आफ्नो समूहका आकांक्षी व्यवस्थापनका लागि आज छलफल गर्दैछन् ।

देउवा निवास बुढानिलकण्ठमा सुरु भएको संस्थापन पक्षको बैठकमा केन्द्रीय पदाधिकारी र सदस्यहरुलाई बोलाइएको छ । बैठकमा संस्थापन पक्षबाट उपसभापति, महामन्त्री र सहमहामन्त्री पदका उम्मेदवारहरुबारे छलफल हुने बताइएको छ ।

त्यस्तै साझा उम्मेदवार चयन गर्न वरिष्ठ नेता रामचन्द्र पौडेल पक्षको बैठक पनि सुरु भएको छ । अनुपम फुडल्याण्डमा सुरु भएको बैठकमा पौडेल पक्षका केन्द्रीय सदस्य, नवनिर्वाचित जिल्ला सभापति, निवर्तमान जिल्ला सभापति र प्रदेश सभापति पदका आकांक्षीहरुलाई बोलाइएको छ ।

बैठकमा पौडेलबाहेक सभापतिका अन्य आकांक्षी भने उपस्थित हुने छैनन् । सो बैठकले सभापतिको साझा उम्मेदवार छान्ने विषयमा राय लिने बताइएको छ ।