म्यानमारकी नेतृ सूचीविरुद्ध सुनाइएको जेल सजाय आधा घटाइयो

काठमाडौं । म्यानमारकी लोकतन्त्रवादी नेतृ आङसाङ सूचीमाथि सुनाइएको चारवर्षको जेल सजायलाई आधा घटाइएको छ ।

त्यहाँको राज्य नियन्त्रित मिडियाका अनुसार सैनिक प्रमुख मिनआङ हेङले सूचीलाई सुनाइएको सजायलाई आधा मिनाहा गर्ने घोषणा गरेका हुन् ।

राष्ट्रपति विन मिन्टलाई सुनाइएको चारवर्ष लामो जेल सजायलाई पनि आधा कटौती गरिएको छ । सोमबार म्यानमार अदालतले कोभिड प्रोटोकल उल्लंघन गरेको र राज्यविरुद्ध उक्साएको आरोपमा नेतृ सूचीलाई चारवर्ष जेल सजाय सुनाएको थियो ।

सोमबार अदालतले गरेको उक्त फैसला ७६ वर्षिया नेतृविरुद्ध लगाइएको मुद्दामध्येको पहिलो हो । गत फेब्रुअरी १ मा सेनाले जननिर्वाचित सरकारलाई अपदस्थ गर्दै शक्ति नियन्त्रणमा लिएको थियो ।

तर, आफूविरुद्ध लगाइएका सबै आरोपहरुको नेतृ सूचीले खण्डन गरेकी छिन् ।