एमाले महाधिवेशनस्थलमा बिहानैदेखि कार्यकर्ताको चहलपहल (१५ तस्बिरमा हेर्नुस्)

चितवन ।  नेकपा एमाको १० औं महाधिवेशनको आज उद्घाटन हुँदैछ । चितवनको नारायणगढस्थित नारायणी नदी किनारमा हुने उद्घाटन कार्यक्रममा पाँच लाखभन्दा बढी कार्यकर्ता उतार्ने दावी एमालेको छ ।

उद्घाटनको दिन बिहानैदेखि कार्यक्रमस्थल वरपर कार्यकर्ताको उल्लेख्य चहलपहल देखिएको छ । रात्रीबसमा चितवन आएका कार्यकर्ताहरु विहानै नारायणगढ ओर्लिएपछि सिधै कार्यक्रमस्थलतर्फ पुग्न थालेका छन् ।

महाधिवेशन स्थलसम्म पुग्नका लागि एकद्वार प्रणाली अपनाइएको छ । नारायणगढ बजारबाट नारायणी तटमा पुग्ने अन्य सबै सहायक मार्गहरु बन्द गरिएको छ । चीसोको पर्बाह नगरी एमाले कार्यकर्ताहरु नारायणी किनार पुगेका छन् ।

उद्घाटन कार्यक्रमका लागि चितवन आसपासका जिल्लाबाट पनि विहानैदेखि कार्यकर्ताहरु नारायणगढ पुग्ने क्रममा छन् । गोरखा, धादिङ, मकवानपुर, नवलपरासी, तनहुँ लगायतका जिल्लाबाट आज गाडीको व्यवस्थासहित कार्यकर्तालाई नारायणगढ पुर्‍याइँदै छ ।

दिउँसो १२ बजे उद्घाटन समारोह सुरु हुने कार्यतालिका छ । उद्घाटनमा नेकपा माओवादी केन्द्रका अध्यक्ष प्रचण्डबाहेक सबै पार्टीका शीर्षस्थ नेताहरु सहभागी हुने बताइएको छ । एमाले फुटेर बनेको नेकपा एकीकृत समाजबादीका अध्यक्ष माधवकुमार नेपाल पनि कार्यक्रममा जाने छैनन् ।