बागलुङमा एमालेका ६ जना महाधिवेशन प्रतिनिधि सर्वसम्मत चयन

बागलुङ । नेकपा (एमाले)को आसन्न १० औं महाधिवेशनका लागि बागलुङ जिल्लाबाट प्रतिनिधित्व गर्ने १२ प्रतिनिधि मध्य छ जना सर्वसम्मत चयन भएका छन् ।

जिल्लाभरबाट दुई जना दलित प्रतिनिधिका लागि ढोरपाटन नगरपालिकाका मेयर देवकुमार नेपाली र नेकपा (एमाले) बागलुङ नगर कमिटिका अध्यक्ष धनबहादुर नेपाली सर्वसम्मत चयन भएका छन् ।

यस्तै एक महिला र तीन अन्यको प्रतिनिधित्व हुने बागलुङ क्षेत्र नं. २ बाट महिलातर्फबाट यमुना राना, अन्यतर्फ पुराना नेता मोहनलाल शर्मा, पूर्व पार्टी उपाध्यक्ष सञ्जय शेरचन (सुनिल) र तुलसीराम अर्याल सर्वसम्मत चयन भएको नेकपा एमाले बागलुङका इन्चार्ज मनकुमारी केसीले जानकारी दिएकी छन् ।

सर्वसम्मत चयन भएका अर्याल नेकपा एकता पूर्व नेकपा माओवादी (केन्द्र)का केन्द्रीय सदस्य थिए । उनी एकता प्रक्रियामा एमालेमै रहेका हुन् ।

क्षेत्र नम्बर एकबाट दुई महिलाका लागि पाँच जना र चार खुल्लाका लागि १२ जनाले उमेदवारी दर्ता गराएका छन् । बागलुङमा पाँच हजार २६४ संगठित सदस्य मध्य बागलुङ क्षेत्र नं. १ मा तीन हजार चार सय र क्षेत्र नं. २ मा एक हजार ८६४ जना संगठित सदस्य रहेको जिल्ला सचिव विष्णु भुसालले जानकारी दिए ।