मुन्द्रेको कमेडी क्लबबारे करिश्माको अनुभव : नक्कली हाँसो हाँस्न जानिँन, आउँदै आउँदैन !

काठमाडौं । अभिनेता जितु नेपाल दुई कारणले अहिले पुनः चर्चामा छन् । पहिलो : उनले अढाइ वर्षदेखि संचालन गरेको टिभी सो ‘मुन्द्रेको कमेडी क्लब’ सोमबारदेखि बन्द भएको छ ।

दोस्रो: निर्माण सुरु हुन लागेको फिल्म ‘छक्कापञ्जा-४’ को टीजरमा उनी अटाउन नसक्दा यो फिल्ममा उनको भविष्यलाई लिएर विभिन्न अड्कलबाजी भैरहेको छ ।’

सो बन्द भएपछि जितु र अध्यक्ष बनेकी करिश्मा मानन्धरले पत्रकार सम्मेलन आयोजना गरेका थिए । जितुले फुलन्देकी आमा (उमेश राई), कि एड्भर्टाइजिङसहितलाई विभिन्न कारण देखाउँदै सो बन्द गर्नुपरेको बताएका थिए । करिश्माले पनि सोमा अध्यक्ष हुँदाका अनुभव बाँडिन् ।

अघिल्ला अध्यक्ष दीपाश्री निरौलाको तुलनामा कमजोर अध्यक्ष भएकी भनेर आलोचित करिश्माले उक्त पत्रकार सम्मेलनमा आफ्नो बचाउ प्रयास गरिन् ।

‘कमेडीलाई मैले दर्शकको रुपमा हेरेकी थिएँ । यसको प्रक्रियाको बारेमा केही थाहा थिएँन । यो सोको हिस्सा बन्दा मैले यसको पूरा प्रक्रिया बारे थाहा पाएँ । तर मैले नक्कली हाँसो हाँस्न जानिँन । किनकी त्यो सक्दै सक्दिन, आउँदै आउँदैन’ उनले भनिन् ।

जितुले जिद्दि गरेकाले आफू अध्यक्ष भएको करिश्मा कथन थियो । ‘जितुले पहिलोचोटी भन्दा त मैले हुँदैन भनेर टार्न खोजेकी थिएँ । जितुले जिद्दि गर्न छाडेन । जिन्दगीमा यति धेरै त प्रयोग गर्नुभएको छ, यो एउटा प्रयोग गर्दा के हुन्छ भनेर सम्झायो । उसलाई सहयोगको पनि खाँचो छ भनेर मैले सोको हिस्सा बन्ने निर्णय गरेँ’ उनले भनिन् ।

करिश्माले मुन्द्रेको कमेडी क्लबमा बिताएको एकवर्ष आफ्ना लागि पाठशाला भएको बताएकी थिइन् ।