‘कबड्डी-४’ फिल्म छायांकन आधा सकियो, मुस्ताङमा यसरी हुँदैछ सुटिङ

काठमाडौं । रामबाबु गुरुङले निर्देशन गरिरहेको फिल्म ‘कबड्डी-४’ छायांकन आधा सकिएको छ । आगामी दुई सातामा फिल्मको सबै छायांकन पुरा हुने मुस्ताङबाट निर्माता मणिराम पोखरेलले नेपाल प्रेसलाई जानकारी दिए ।

‘कोवाङ र लार्जुङमा फिल्म छायांकन हुँदैछ । टुकुचेसहित तीनचार लोकेसनमा खिच्न बाँकी छ’ उनले भने, ‘मौसमले साथ दिएको छ । १५ दिनमा सुटिङ सकेर काठमाडौं फर्कनेछौं ।’

फिल्मको सुटिङ सेटबाट नेपाल प्रेसलाई एक्सक्लुसिभ तस्बिर समेत प्राप्त भएको छ । जहाँ दयाहाङ राई, विजय बराल, बुद्धि तामाङलाई अभिनय गरिरहेको देख्न सकिन्छ । तस्बिरमा कबड्डी फिल्मको सिनेम्याटिक सेटिङ पनि देख्न सकिन्छ ।

काठमाडौं फर्किएपछि मात्र प्रदर्शन मिति घोषणा हुने निर्माता पोखरेलले जनाए । कबड्डीका अघिल्ला तीनैवटा सिक्वेलले नेपाली बक्सअफिसमा राम्रो कमाइ गरेका थिए ।