प्रधानन्यायाधीशले आफूलाई पनि पेसी तोकेपछि सर्वोच्चको गतिरोध लम्बिने संकेत
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/05/cholendra-shumsher-jb-rana.jpg)
काठमाडौं । प्रधानन्यायाधीश चोलेन्द्र शमसेर जबराले आफूसहितको इजलास तोकेपछि सर्वोच्च अदालतमा जारी गतिरोध लम्बिने संकेत देखिएको छ । असन्तुष्ट न्यायाधीशहरूसँग प्रधानन्यायाधीशले यसअघि आफूले मुद्दा नहेर्ने सन्देश पठाएर वार्ता चलिरहेको थियो ।
तर, सोमबार प्रधानन्यायाधीश जबराले आफूसहित आन्दोलनको अग्रभागमा नरहेका मध्यमार्गी स्वभावका न्यायाधीशहरूको मात्र इजलास तोकेर बन्दी प्रत्यक्षीकरणका मुद्दा पेसीमा चढाएका छन् ।
प्रधानन्यायाधीश चोलेन्द्र शम्सेर राणाको राजीनामाको माग गरेर २ सातादेखि सर्वोच्च अदालतका न्यायाधीशहरू इजलास बसेका छैनन् ।
केही दिनदेखि विवादलाई समाधान गर्न असन्तुष्ट न्यायाधीशहरूले अनिल सिन्हा, सपना प्रधान मल्ल र मनोज शर्माको कार्यदल बनाएर प्रधानन्यायाधीशसँग सहजीकरण गराउन पठाएका थिए । उनीहरूसँग प्रधानन्यायाधीश राणााले आफूले इजलासमा मुद्दाको सुनुवाइ नगर्ने र बन्दीप्रत्यक्षीकरणबाहेकका अन्य मुद्दाको सुनुवाइ नगर्ने सहमति गरेका थिए ।
तर, प्रधानन्यायाधीश राणाले लामो समयको गतिरोधले मुद्दाको सुनुवाई प्रभाव पारेको भन्दै आफुलाई पनि पेसी तोकेपछि गतिरोध अझै बढने सम्भावना देखिएको छ। प्रधानन्यायाधीश राणाले तोकेका मुद्दाको सुनुवाइ पनि नगर्ने अडानमा न्यायाधीशहरू पछि हटेका छैनन् । भने प्रधानन्यायाधीश राणाले आफू संवैधानिक बाटोबाट मात्रै निकास निकाल्ने बताउँदै आएका छन् ।
नेपाल बार एशोसिएसनसमेत आन्दोलनमा उभिएको छ । नेपाल बारले आन्दोलनका थप कार्यक्रम घोषणाका लागि आज फेरि बैठक बस्ने तयारी गरिरहेको छ ।