‘चिसो वर्ष’ फिल्मका लागि निर्देशक भामले ताइवानबाट जिते १ करोड ६५ लाखको फन्ड

काठमाडौं । फिल्म निर्माता मीनबहादुर भामले आगामी फिल्म ‘चिसो वर्ष’को लागि ताइपेइ फिल्म कमिसनबाट १ करोड ६५ लाख (२.५ ताइपेइ डलर)राशीको प्रोडक्सन-फन्ड प्राप्त गरेका छन् ।

ताइवानी फिल्मको सर्वोच्च निकायले गत अक्टोबर २५ मा भामले निर्देशन गर्नेसहितका पाँच फिल्मलाई सन् २०२१ को ताइपेइ फिल्म फन्ड प्रदान गर्ने घोषणा गरेको हो ।

‘कालो पोथी’ फेम्ड निर्देशक भामले यो प्रोजेक्टका लागि यसअघि पनि विभिन्न अन्तर्राष्ट्रिय फन्ड जितेका छन् । भामले निर्देशन गर्ने चिसो वर्षमा नेपालसहित फ्रान्स, टर्की र नर्वेको संयुक्त लगानी हुनेछ ।

नेपालबाहेक अमेरिका, फ्रान्स, मलेसिया, बंगलादेशका फिल्मले पनि ताइपेइ फन्ड प्राप्त गर्ने भएका छन् । चिसो वर्ष फिल्मले पेरिसमा भएको कान्स फिल्म फेस्टिभलमा यसअघि ६६ लाख ८४ हजार रुपैयाँ राशीको नर्वेजियन अवार्ड पनि जितिसकेको छ ।

चिसो वर्षको कथामा आफ्ना हराएका श्रीमान खोज्नका लागि गर्भवती पेमा र बौद्ध भिक्षु कर्मा हिमालयको एक लामो यात्रामा निस्कन्छन् । अन्ततः यात्राकै क्रममा उनीहरुको जीवन बदलिन्छ ।

यसअघि पनि उक्त फिल्मको स्क्रिप्टका लागि निर्देशक भामले १ सय १४ वटा आवेदनलाई पछि पार्दै एसियन सिनेमा फन्ड जितेका थिए । उक्त फन्डको राशी १० हजार अमेरिकी डलर थियो । यस्तै स्वीटजरल्यान्डको लोकार्नो फिल्म फेस्टिभलमा ६ हजार यूरो करिब ८ लाख रुपैयाँ जितेको थियो ।