५६ लागे शाहरुख, काठमाडौं आउँदा भनेका थिए : फेरि नेपाल घुम्न चाँडै आउँछु

काठमाडौं । बलिउड अभिनेता शाहरुख खान आज ५६ औं जन्मदिन मनाउँदैछन् । उनलाई संसारभरबाट प्रशंसक र शुभचिन्तकले सामाजिक संजालमार्फत बधाइ दिएका छन् । नेपालमा समेत उनको निकै ठूलो फ्यान फलोइङ छ ।

वृद्धवृद्धादेखि पछिल्लो छिमलका अभिनेताहरु समेत यहाँ छन् । २९ वर्षदेखि बलिउड फिल्ममा सक्रिय शाहरुखलाई पछ्याउने नेपालीहरुको संख्या बढी नै छ । यसबीच शाहरुखले पटक–पटक नेपाल भ्रमण पनि गरे । उनी आफ्ना व्यवसायिक ब्रान्ड प्रवद्र्धन गर्नदेखि फिल्म छायांकनलाई पनि नेपाल आएको इतिहास छ ।

केही वर्षअघि नेपाल आउँदा विमानस्थलदेखि उनी बसेको होटलसम्म फ्यान क्रेज देखिएको थियो । काठमाडौं एयरपोर्टमा उनलाई स्वागत गर्न झाँकी समेत प्रस्तुत गरिएको थियो ।

हायात रिसोर्टमा आयोजित कार्यक्रममा बोल्दै खानले नेपाली नागरिक र नेपालको प्राकृतिक सौन्दर्यको गुणगान गाएका थिए । उनले चाँडै आफू नेपाल घुम्न आउने समेत बताएका थिए । २९ वर्षअघि ऋषि कपुर र दिव्या भारतीय स्टारर फिल्म ‘दिवाना’बाट बलिउडमा अभिनय करियर थालेका शाहरुख यो उमेरमा पनि लोकप्रिय छन् ।

किङ खानको रुपमा चर्चित उनको यसपटकको जन्मदिन विशेष रह्यो किनभने छोरा आर्यन लागूऔषध प्रकरणमा एक महीना जेलमा बसेर गतसाता रिहा भए । छोराकै कारण उनले कतिपय प्रोजेक्ट रोकेका थिए भने आर्यनको रिहाइ पछि शाहरुखलाई ठूलो राहत मिलेको छ । बलिउड संचारमाध्यमका अनुसार यसपटक शाहरुखले मन्नतमा विशेष तिहार कार्यक्रमको पनि आयोजना गरेका छन् भने घरलाई उज्यालो बत्तीले पनि सजाइएको छ ।