काठमाडौं महानगरको कांग्रेस नेतृत्वका लागि आइतबार निर्वाचन हुने

काठमाडौं । नेपाली कांग्रेसको १४ औं महाधिवेशन अन्तर्गत काठमाडौं महानगर कार्यसमिति चयनका लागि आइतबार मतदान हुने भएको छ । महानगर अधिवेशन आज उद्घाटन भएपनि नेतृत्वका लागि आइतबार मतदान हुने निर्वाचन समितिले जनाएको छ ।

निर्वाचन समितिले काठमाडौं महानगरको नेतृत्व चयनका लागि आइतबार बिहान ९ बजेदेखि १ बजेसम्म मतदान हुने जनाएको छ । मतदान सकिएलगत्तै मतगणना सुरु हुनेछ ।

कांग्रेसको काठमाडौं महानगर सभापतिमा संस्थापन पक्षका प्रगतिमान रञ्जित र संस्थापन इतर पक्षका नीलकाजी शाक्य प्यानलसहित प्रतिस्पर्धामा छ । रञ्जितलाई सभापति शेरबहादुर देउवासहित नेताहरु ध्यानगोविन्द रञ्जित, भीमसेनदास प्रधान, तीर्थराम डंगोल लगायतको समर्थन रहेको छ ।

शाक्यलाई कांग्रेस वरिष्ठ नेता रामचन्द्र पौडेल , पूर्वमहामन्त्री प्रकाशमान सिंह, केन्द्रीय सदस्य गगन थापा लगातयको समर्थन रहेको छ ।