कोरोना संक्रमणबाट विश्वमा मृत्यु हुनेको संख्या ५० लाख नाघ्यो

काठमाडौं । कोरोनाभाइरस संक्रमणबाट विश्वभर मृत्यु हुनेको संख्या शुक्रबार ५० लाख नाघेको छ । मृत्यु बढी हुनेमा खोप नलगाएका बढी छन् भने मृत्युदर बढ्नुमा डेल्टा भेरिएन्टलाई कारण मानिएको छ ।

डेल्टा भेरिएन्टले केही पश्चिमा मुलुकमा धनी र गरिबबीचको खोपलाई लिएर असमानता र हिच्किचाहट सिर्जना गरेको रोयटर्सले जनाएको छ । कोरोना फैलिएको एक वर्षमै २ लाख ५० हजार जनाको मृत्यु भएको थियो ।

त्यसको आठ महीनामै थप अढाइ लाख जनाको कोरोना संक्रमणले मृत्यु भएको देखिएको छ । पछिल्लो एक सातामा अमेरिका, रुस, ब्राजिल, मेक्सिको र भारतमा मात्र विश्वकै मृत्युको आधा संख्याको मृत्यु तथ्यांक प्राप्त भएको छ ।

पछिल्लो सातादेखि विश्वभर दैनिक ८ हजार जनाको मृत्यु भएको छ जुन प्रतिमिनेट पाँचजनाको मृत्यु हो । तर, विश्व मृत्युदरमा भने केही महीनायता गिरावट आएको छ ।

पछिल्लो समय केही गरिब मुलुकहरुमा खोप अभियानमा वृद्धि भएको छ भने केही विकसित मुलुकहरुमा बुस्टर डोज लगाउन सुरु भएको छ । रोयटर्सका अनुसार अहिलेसम्म विश्वको आधा जनसंख्या भन्दा बढीले एक डोज खोप पनि पाएका छैनन् ।