देउवा दोहोरिए कांग्रेसले दुःख पाउँछ : प्रकाशमान

काठमाडौं । नेपाली कांग्रेसका पूर्व महामन्त्री प्रकाशमान सिंहले पार्टीको १४ औं महाधिवेशनमा नेतृत्व परिवर्तन जरुरी रहेको बताएका छन् ।

काठमाडौं महानगर अधिवेशनको उद्घाटन गर्दै नेता सिंहले सभापति शेरबहादुर देउवाको कार्यकाल कांग्रेसका लागि निराशाजनक रहेको बताए । ‘हाम्रो पार्टी सभापति प्रजातन्त्रका लागि योगदान गरेको नेता हो तर १३ औं महाधिवेशनपछि उहाँले अवसर पाएकै होनि । उहाँको नेतृत्वमा पार्टीले चुनाव हार्यो, पार्टीभित्र आन्तरिक लोकतन्त्र भएन । अबपनि उहाँ नै दोहोरिने हो भने कांग्रेसले अझै दुःख पाउँछ’, सिंहले भने ।

आफू गिरिजाप्रसाद कोइराला सभापति रहेकै पार्टीको उपसभापति भइसकेको व्यक्ति रहेको भन्दै सिंहले अब नेतृत्वमा आफ्नो स्वभाविक दावी रहने बताए । गणेशमान सिंहको परिवारमा भएकै कारण जिन्दगीभर दुःख पाएको भन्दै सिंहले देशभरका दुःख पाएका कार्यकर्ताको लागि आफू अगाडि बढेको बताए ।