कप्तान ज्ञानेन्द्र मल्लको अर्धशतक

काठमाडौं । विश्वकप क्रिकेट लिग–२ अन्तर्गत त्रिदेशीय एकदिवसीय अन्तर्राष्ट्रिय शृंखलामा अमेरिकाविरुद्ध नेपालका कप्तान ज्ञानेन्द्र मल्लले अर्धशतक बनाएका छन् । ओमानको मस्कटस्थित अल अमेरत क्रिकेट मैदानमा जारी खेलमा टस हारेर ब्याटिङको निम्तो पाएको नेपालका लागि वान् डाउनमा ब्याटिङ गर्न आएका ज्ञानेन्द्रले ९१ बलमा ३ चौकासहित अर्धशतक पूरा गरेका हुन् ।

राष्ट्रिय टोलीमा डेब्यूट्यान्ट गुल्शन झासँग ५१ रनको साझृदारी गर्दै कप्तान मल्लले नेपालका लागि महत्त्वपूर्ण ५० रन पूरा गरे । ओपनर कुशल भुर्तेल ४३ बलमा ५ चौका र १ छक्कासहित ३६ रन बनाएर पेभेलियन फर्किँदा आशिफ शेख ३ रनमा आउट भए ।

त्यस्तै, रोहित पौडेल २ मा पेभेलियन फर्किँदा विनोद भण्डारीले १० रन मात्र जोडेर आउट भए । डेब्यूट्यान्ट गुल्शनले ५३ बलमा २ चौका र १ छक्कासहित २८ रनको योगदान गरे । त्यस्तै कुशल मल्ल शुन्यमा पेभेलियन फर्किएका छन् ।

४१ ओभर सकिँदा नेपाल अहिले १४४/६ को अवस्थामा ब्याटिङ गरिरहेको छ । अमेरिकाका लागि कप्तान सौरभ नेत्राभल्करले २ तथा काएल फिलिप, करिमा गोर, एल्मोर हचिन्सन र नोस्ठुस केन्जिगेले १/१ विकेट लिएका छन् ।