विप्लवलाई छोडेका कार्कीको नेतृत्वमा नेकपा समाजवादी दर्ता

काठमाडौं । निर्वाचन अयोगमा नेकपा (समाजवादी) दर्ता भएको छ । सो पार्टीले दर्ता प्रमाणपत्रसमेत पाइसकेको छ ।

नेकपा (माओवादी केन्द्र), नेकपा (एकीकृत समाजवादी) र जनता समाजवादीबीच एकीकरण गरेर समाजवादी केन्द्र बनाउने चर्चा चलिरहका बेला आयोगमा उक्त नामको पार्टी दर्ता भएको हो ।

बूढानीलकण्ठमा कार्यालय रहेको पार्टीको संयोजक राजु कार्की छन् । चुनाव चिन्ह कार राखिएको छ। संयोजकबाहेक प्रवक्ता रहने ५१ जनाको केन्द्रीय कमिटी रहने कार्कीले जानकारी दिए ।

कार्की नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी मा किसान महासंघको अध्यक्ष थिए । विप्लवसँग विचार नमिलनेपछि आफूले दुई वर्षअघि नै उनलाई छोडेर नयाँ पार्टी दर्ता गर्ने प्रक्रिया चालेको कार्कीले बताए ।

माओवादी केन्द्र र एकीकृत समाजवादीसँग एकता नहुने तर कार्यगत एकता भने हुन सक्ने उनको भनाइ छ । एकताका लागि एमाले र माओवादी केन्द्रबाट प्रस्तावसमेत आएको कार्कीले दावी गरे ।

माधव नेपालले नेकपा (समाजवादी) का नाममा नयाँ दल दर्ता गर्न खोजेका थिए । तर, कार्कीले पहिल्यै निवदेन दिएकाले आयोगले त्यो नाम दिएको थिएन ।