सेनेगलद्वारा एमसीसी सम्झौतामा हस्ताक्षर, विद्युत प्रसारणमा अमेरिकाले ५५० मिलियन डलर खर्च गर्ने

डाकर । पश्चिम अफ्रिकी राष्ट्र सेनेगेलले अमेरिकी अनुदान सम्झौता (एमसीसी)मा आज हस्ताक्षर गरेको छ । ५५० मिलियन डलर राशीको उक्त अनुदानमार्फत सेनेगलमा विद्युत पूर्वाधारण निर्माण हुने र यसबाट १२ मिलियन नागरिक लाभान्वित हुने अमेरिकाले जनाएको छ ।

एमसीसी परियोजनाबाट सेनेगलका दूरदराजका गाउँमा पनि विद्युत प्रसारण हुने अमेरिकी संचारमाध्यमले जनाएका छन् । एमसीसीका कार्यकारी अधिकृत मोहम्मद बाहले यो परियोजनाबाट सेनेगलमा विद्यमान विद्युतको खराब परिस्थितीमा सुधार आउने रोयटर्सलाई बताए ।

एमसीसीमा हस्ताक्षर गर्नुअघि सेनेगलले अनुदान प्राप्तीसम्बन्धी केही कानूनहरुमा परिवर्तन गरेको थियो । गत जुनमा त्यहाँको संसदबाट पारित एक बिलले विद्युतमा राज्यको एकाधिकार तोड्दै निजी कम्पनीलाई पनि लगानीको बाटो खुला गरेको थियो । यो पुनर्संरचनाले विद्युत प्रसारण र वितरणमा स्वतन्त्र कम्पनीहरु आउन सक्ने आशा लिइएको छ ।

एमसीसी अनुदानमा हस्ताक्षर गरेपछि अमेरिकी विदेशमन्त्री एन्टोनी ब्लिंकेनले आज सेनेगललाई बधाई दिएका छन् ।