पूर्वसभामुख दमननाथले भने- सभामुखमाथि दलीय पूर्वाग्रहको प्रश्न गम्भीर, अध्यक्षता गर्न असहज हुनेछ

काठमाडौं । पूर्वसभामुख दमननाथ ढुंगानाले सभामुखको निष्पक्षतामाथि प्रश्न उठ्नु गम्भीर विषय भन्दै यसले प्रतिनिधिसभाको बैठकको अध्यक्षता गर्न असहज हुने टिप्पणी गरेका छन् ।

ढुंगानाले ट्वीटरबाट आफ्नो धारणा राख्दै पटक-पटक अविश्वासको वातावरणमा अध्यक्षता असहज हुँदै जाने बताएका छन् । उनले प्रतिनिधिसभाको कार्यकाल पुनः घाइते नहोस् भन्दै सचेत समेत गराएका छन् ।

ढुंगानाले भनेका छन्, ‘सभामुखबाट भइसकेको निर्णयबारे निष्पक्षता, तटस्थता अथवा दलीय पूर्वाग्रहको प्रश्न उठ्नु गम्भीर अवस्था हो । पटक-पटक अविश्वासको वातावरणमा अध्यक्षता असहज हुँदै जान्छ । प्रतिनिधिसभाको कार्यकाल कतै पुनः घाइते नहोस् !’

सभामुख अग्नि सापकोटाको भूमिकालाई लिएर एमालेले संसद अधिवेशन शुरू भएकै दिन अवरोध गरेको छ । एमालेले सभामुख एमाले विभाजनमा सक्रिय रहेको र पार्टीले कारवाही गरेका सांसदको सूचना टाँस नगरी कानून उल्लंघन गरेको भन्दै १४ सांसदलाई सदनमा प्रवेश दिएसम्म बैठक चल्न नदिने बताएको छ ।