माधव पक्षले बनाएको एमाले काठमाडौंको समानान्तर कमिटी एकीकृत समाजवादीमा समाहित

काठमाडौं । नेकपा एमालेको तत्कालीन माधव नेपाल समूहले काठमाडौंमा गठन गरेको समानान्तर जिल्ला कमिटी एकीकृत समाजवादीमा समाहित भएको छ ।

माधव नेपाल पक्षले वसन्त मानन्धरको अध्यक्षतामा काठमाडौंमा समानान्तर कमिटी गठन गरेको थियो । प्रदेशसभा सदस्यसमेत रहेका मानन्धरले बुधबार बसेको बैठकले सिंगो कमिटी एकीकृत समाजवादीमा रुपान्तरित हुने निर्णय गरेको बताए ।

उनले भने, ‘हिजो एमाले हुँदा हामीले बनाएको कमिटी अब एकीकृत समाजवादी भएको छ । अरुको कुरा थाहा भएन प्रदेशसभा सदस्यमध्ये म चाहिँ एमालेमा रहिन । अरु साथीहरू पनि विस्तारै खुल्नु होला ।’

मानन्धर तत्कालीन नेकपा हुँदै एमालेको केन्द्रीय सदस्य तथा काठमाडौं क्षेत्र नम्बर ७ अन्तर्गत प्रदेशसभा सदस्य निर्वाचित भएका नेता हुन् ।

अनेरास्ववियूका पूर्वमहासचिव रहिसकेका मानन्धर तत्कालीन माले हुँदै आएका घनश्याम भुसाल र योगेश भट्टराई समूहसँग नजिक थिए । तर, यसपटकको नेकपा एमाले विभाजनमा भने उनी माधव नेपालको पक्षमा उभिएका छन् ।

काठमाडौंबाट एमालेले प्रदेशसभामा प्रत्यक्षतर्फ २० मध्ये १६ सिट जितेको थियो । तीमध्ये रमा आले मगर र वसन्त मानन्धर माधव नेपालको पार्टीमा केन्द्रीय सदस्य बनेका छन् ।