आँचल शर्मा कर तिर्न पुग्दा कर्मचारी झुम्मिए (भिडिओ)

काठमाडौं । अभिनेत्री आँचल शर्मा काठमाडौंको लाजिम्पाटस्थित आन्तरिक राजस्व विभागको कार्यालयमा कर बुझाउन पुगिन् । कर बुझाउन अफिस गएको भिडिओलाई कर्मचारीले खिचेर सामाजिक संजालमा सेयर गरेपछि अहिले टिकाटिप्पणी भैरहेको छ ।

१४ सेकेन्ड लामो उक्त भिडिओमा आँचललाई कर्मचारीले न्यानो आतिथ्यता देखाएका छन् । हाम्रो अड्डा कस्तो लाग्यो भनेर कर्मचारीले सोधेको आवाज पनि सुन्न सकिन्छ । जवाफमा आँचलले आफूलार्ई अरुभन्दा सेवा राम्रो लागेको बताएकी छिन् ।

आँचल कर कार्यालयमा पुगेको क्षणलाई कर्मचारीले कैद गरेको र आतिथ्यता देखाएको कुरालाई लिएर सामाजिक संजालमा बहस भैरहेको छ । भिडिओ सेयर गर्ने चाहिँ अर्थ मन्त्रालयका उपसचिव कर्ण तिमल्सिना हुन् । ‘एकजना नयाँ करदाता थपियो’ क्याप्सनमा उनले भिडियो पोस्ट गरेका छन् ।

उक्त भिडियोमा गगन अविदित कमेन्ट गर्छन् : राम्रो सेवा पाउन सेलेव्रिटी, पहुँचवाला नेता वा त्यहीँका कर्मचारी आफन्त हुनुपर्छ नेपालका हर सरकारी कार्यालयमा । साधारण जनतालाई सास्ती नै सास्ती । अर्की प्रयोगकर्ता शशी भण्डारी लेख्छिन् : तपाईंहरुले हाम्रो अड्डा कस्तो लाग्यो र काम कस्तो लाग्यो भनेर अरु सेवाग्राहीलाई पनि सोध्नुहुन्छ कि उहाँलाई मात्रै हो ?’

कोभिड महामारीको बेला पनि आँचलले मास्क नलगाएको भनेर कतिपयले प्रश्न गरेका छन् । यस्तो बेलामा पनि घरबाटै भर्चुअल्ली राजस्व तिर्न सकिने सुझाव कतिपयले दिएका छन् ।