नवल खड्काको फिल्म ‘काँडेतार’मा गौरव पहारी अनुबन्धित

काठमाडौं । नेपाल र भारतको सीमालाई व्यवस्थापन गर्नुपर्ने कथावस्तुसहितको फिल्म ‘काँडेतार’ निर्माणको घोषणा भएको छ । नवल खड्का र शंकर कार्कीले संयुक्तरुपमा निर्देशन गर्ने फिल्म निषेधाज्ञा खुलेपछि छायांकनमा जाने भएको छ ।

मंगलबार फिल्मको मुख्य अभिनेतामा गौरव पहारी अनुबन्धित भएका छन् । निर्देशक खड्काको समेत मुख्य अभिनय हुने फिल्ममा रविन्द्र रञ्जन झाको समेत मुख्य अभिनय हुनेछ ।

‘दुई मुलुकबीचको खुला सीमालाई सिल गर्नुपर्छ भन्ने मुख्य कथावस्तु हो । यसले मान्छे र माटोको सम्बन्ध छ । यसो गर्दा दुई देशबीचको सम्बन्ध कायम हुनेछ’ फिल्म घोषणापछि निर्देशक तथा निर्माता खड्काले नेपाल प्रेससँग भने ।

फिल्म भारत विरोधी नभएको समेत खड्काले बताए । यसअघि पनि खड्काले सीमा समस्यामा आधारित रहेको फिल्म ‘दशगजा’ निर्माण गरेका थिए । डेढकरोड बजेट लाग्ने बताइएको फिल्मको छायांकन चाहिँ सरकारले छायांकन अनुमति दिएपछि सुरु हुने जनाइएको छ ।

सामना फिल्म्स प्रालिको ब्यानरमा बन्ने फिल्मको निर्माण खड्का स्वयमले गर्न लागेका हुन् ।