१४ जनामाथि कारवाही गरेर ओलीले एमाले फुटाए, अब हामी विद्रोह गर्छौं : जीवनराम श्रेष्ठ
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/08/jeebanram-sth-1.jpg)
काठमाडौं । नेकपा एमालेले पार्टीबाट निष्कासन गरेर सांसदबाट पदमुक्त गर्न सूचना दिएका १४ जनामध्येका एक नेता जीवनराम श्रेष्ठले आफूहरूमाथिको कारवाही फिर्ता नभए विद्रोह गरेर नयाँ पार्टी निर्माण शुरू हुने बताएका छन् ।
नेपाल प्रेससँग कुरा गर्दै श्रेष्ठले पार्टी एकताको अन्तिम प्रयास गरौं भनेर घनश्याम भुसाल माधव नेपालको पक्षबाट बालकोटमा वार्ता गर्न गइरहेका बेला अध्यक्ष केपी ओलीले माधवसहित १४ सांसदको पद रिक्त गराउन पत्र पठाएपछि एकताको ढोका बन्द भएको बताए ।
श्रेष्ठले भने, ‘पहिले यताको कुरा टुंग्याउँ भनेर हामी अर्को पार्टी दर्तामा ढिला गर्दै थियौं । बाहिर जे जति कुरा गरे पनि पार्टी एकताको अन्तिम प्रयास गरौं भनेर घनश्याम भुसाल जानुभएको हो । तर, बिनाकारण षड्यन्त्रमूलक र कायर ढंगले हामीमाथि कारवाही भएपछि एकताको ढोका बन्द भएको छ । अब हामी विद्रोह गरेर अघि बढ्छौं ।’
अब एमाले एकताको पहिलो सर्त कारवाही फिर्ता त्यसपछिमात्र वार्ता हुने उनले बताए । माधव नेपालसहितलाई कारवाही गरेर ओलीले पार्टी एकता नचाहेको सन्देश दिएको भन्दै श्रेष्ठले माधव नेपालबिनाको एमाले एकता असम्भव रहेको समेत प्रष्ट पारे ।