आफ्नो नाममा भ्रमपूर्ण प्रचार नगर्न क्रिष्टियानो रोनाल्डोको आग्रह

एजेन्सी । इटलियन क्लब युभेन्टसका पोर्चुगिज सुपरस्टार क्रिष्टियानो रोनाल्डोले क्लबबाट बहिर्गमनबारे अनावश्यक र भ्रमपूर्ण प्रचार नगर्न सबैलाई आग्रह गरेका छन् ।

केहि दिनयता उनको ट्रान्सफर हल्लाहरुले सन्चारमाध्यमदेखि सामाजिक सन्जालमा ठूलो स्थान पाएको थियो । उनलाई रियल मड्रिड फर्कन लागेको, वा म्यानचेस्टर सिटीमा आफैंले आउँछु भनेर प्रस्ताव गरेको, वा पीएसजीमा मेस्सीसँग एउटै टिममा खेल्न लागेकोजस्ता हल्लाहरु सार्वजनिक भएका थिए ।

‘सबैलाई थाहा छ म कुराभन्दा बढी काम गर्छु,’ रोनाल्डोले आफ्ना शुभचिन्तकलाई प्रष्ट पार्दै भनेका छन्, ‘सत्य र तथ्यविना नै स्पेनका सञ्चारमाध्यमले भ्रमको खेती गरिरहेका छन् । अनावश्यक हल्लाको पछाडि कोहि पनि नलाग्नुहोला ।’

उनले रियल मड्रिड र उसका समर्थकप्रतिको सम्मान अहिले पनि उस्तै रहेको बताएका छन् । करिव १० वर्ष रियलमा रहँदा उनले सबैखाले उपलब्धी हासिल गरेका थिए ।