आज दिउँसो सित्तैमा पठाओ ट्याक्सी बुक गर्न सकिने

काठमाडौं । राइड सेयरिङ एप पठाओले आज दिउँसो नि:शुल्क ट्याक्सी चढ्न सक्ने व्यवस्था मिलाएको छ । पठाओ कार लाइट (ट्याक्सी) को दोस्रो एनिभर्सरीको अवसर पारेर दिउँसो २ बजेदेखि दुई बजेर २ मिनेटसम्म सो अफर लागू गरिएको हो ।

सो अवधिभित्र पठाओको मोबाइल एपमार्फत कार लाईट (ट्याक्सी) बुकिङ गर्ने सबै सेवाग्राहीले नि:शुल्क ट्याक्सी चड्न पाउने पठाओ नेपालका क्षेत्रीय निर्देशक असिममान सिंह बस्न्यातले जानकारी दिए ।

पठाओमा ८ हजार ट्याक्सी आवद्ध भएको भन्दै हाल दैनिक २ हजार ५ सयले सक्रियरूपमा सेवा लिइरहेको बस्न्यात बताउँछन् ।

एपमा नै भाडा देखिने भएकोले बार्गेनिङ समेत गर्न नपर्ने हुँदा राइडिङ सेयरिङ एप यात्रुका लागि सहज छ ।

कोरोना जोखिमलाई ध्यान दिँदै पठाओले स्वास्थ्य मापदण्डलाई समेत कडाइका साथ लागू गरेको छ ।

नेपालमा सन् २०१८ को सेप्टेम्बरदेखि बाइक राइड सेयरिङ सेवा शुरू गरेको पठाओ नेपालले सन् २०१९ को अगस्टदेखि कार लाइट (ट्याक्सी) सेवा थालेको हो ।

सन् २०२० सेप्टेम्बरबाट होटल तथा रेस्टुरेन्टका खाजा तथा खानाका परिकारको होम डेलिभरी सेवा शुरू गरेको पठाओले हाल ‘पठाओ बजार’ मार्फत ग्रोसरी सामान डेलिभरी शुरू गरेको छ ।