चीन र आसियान मुलुकबीच साउथ चाइना सीबारे छलफल : अमेरिकी हस्तक्षेप रोक्न एकजुट हुने

बेइजिङ । विवादित जलक्षेत्र साउथ चाइना सीबारे चीन र आसियान मुलुकहरुबीच मिलेर अघि बढ्ने सहमति भएको छ । चिनियाँ विदेशमन्त्री वाङ यीले आयोजना गरेको भर्चुअल सम्मेलनमा विवादित जलक्षेत्रमा अमेरिकालाई रोक्नेबारे छलफल भएको जनाइएको छ ।

चिनियाँ विदेशमन्त्रीले आसियान मुलुकका आफ्ना समकक्षीसँग साउथ चाइना सीबारे मंगलबार बेलुका छलफल गरेका थिए । छलफलमा यीले अमेरिकालाई समस्या सिर्जना गर्ने मुलुकको रुपमा उल्लेख गरेका थिए ।

छलफलमा यीले अमेरिकातर्फ लक्षित गर्दै बाह्य हस्तक्षेप भए चीन चुप लागेर नबस्ने बताएका थिए । पछिल्लो समय चीन र अमेरिकाले साउथ चाइना सीलाई आफ्नो प्रभाव क्षेत्रको रुपमा दाबी गरिरहेका छन् । जसले गर्दा दुई ठूला शक्तिराष्ट्रबीच तनावको स्थिती सिर्जना भएको छ ।

चीनले पूर्वी एसियाली मुलुकको संगठन आसियनका सदस्य राष्ट्रसँग छलफल गर्नुको उद्देश्य साउथ चाइन सीबारे आचारसंहिता बनाउनु हो । चिनियाँ विदेश मन्त्रालयले जारी गरेको विज्ञप्तिमा वाङ यीले राजनीतिक सहमति जुट्ने वित्तिकै कुनै महामारी वा बाह्य हस्तक्षेप अवरोधको रुपमा नरहने बताएको उल्लेख छ ।

साथै, विदेशमन्त्री यीले साउथ चाइना सीमा चीनले दावी नगर्ने र जल क्षेत्रमा अवरोध गर्ने काम नगर्ने बताएका थिए । ‘साउथ चाइना सी शक्तिराष्ट्रहरुको लड्न थलो बन्नु हुन्न । हामी सिंगो क्षेत्रमै अस्थिरता ल्याउने कार्य गर्न अनुमति दिँदैनौं’ उनले भने ।

गतसाता अमेरिकी रक्षामन्त्री लियोड अस्टिनले उक्त क्षेत्रको भ्रमण गरेका थिए भने, अमेरिकी उपराष्ट्रपति कमला ह्यारिसले आगामी महीना साउथ चाइन सी क्षेत्रको भ्रमण गर्ने अपेक्षा गरिएको छ ।