महाधिवेशनको लागि दबाब दिन कांग्रेस युवा नेताहरूको भेला जारी

काठमाडौं । १४ औं महाधिवेशनका लागि दबाब दिन नेपाली कांग्रेसको केन्द्रीय समिति बाहिर रहेका युवा नेताहरूको भेला शुरू भएको छ ।

काठमाडौंको बत्तीसपुतलीस्थित अनुपम फुडल्याण्डमा जारी भेलाको संयोजनक नेविसंघका पूर्वमहामन्त्री एवं युवा नेता मनोजमणि आचार्यले गरेका छन् । भेलामा युवा नेताहरू रञ्जित कर्ण, प्रकाश स्नेही, बिनोद कायस्थ, प्रमोदहरी गुरागाइँ, प्रतिमा गौतम, रीता खनाल, गणेश भट्ट, मनहरी श्रेष्ठ, डिल्लीराम सुवेदी, उर्मिला थपलियालगायत उपस्थित छन् ।

‘पार्टीको महाधिवेशनप्रति देखिएको उदासीनताप्रति खबरदारी गर्न, पार्टी नेतृत्वलाई खबरदारी गर्न र केन्द्रीय समितिबाहिर रहेका युवा साथीहरुबीच सहकार्य बढाउन हामी जुटेका हौ’, भेलाका संयोजक मनोजमणि आचार्यले बताए । भेलामा पार्टीको आन्तरिक राजनीतिक, महाधिवेशन र युवा नेताहरूको भूमिकाबारे छलफल गरेर साझा निष्कर्ष निकालिने जनाइएको छ ।