आजदेखि भारत राष्ट्रसंघीय सुरक्षा परिषद्को अध्यक्षता सम्हाल्दै

न्यूयोर्क । राष्ट्रसंघीय सुरक्षा परिषद्को अध्यक्षको कार्यभार भारतले सम्हालेको छ । आलोपालो प्रणालीअनुसार भारतले अगस्ट महीनाका लागि अध्यक्षता प्राप्त गरेको हो ।

फ्रान्सको समर्थनपछि भारतले समितिको अध्यक्षताको मौका पाएको हो । भारतले अध्यक्षताको दौरान तीन उच्चस्तरीय बैठक गर्ने तयारी गरेको छ जसमा सामुन्द्रीक सुरक्षा, शान्ति स्थापना र आतंकवादजस्ता मूलभूत मुद्दामाथि छलफल हुने जनाइएको छ ।

साथै, भारतले शान्ति सैनिकको क्षेत्रमा पनि कार्य गर्ने जनाइएको छ । ९ अगस्टमा भारतीय प्रधानमन्त्री नरेन्द्र मोदीले समितिको बैठक भर्चुअलरुपमा गर्न सक्ने सम्भावना रहेको भारतीय संचारमाध्यमले जनाएका छन् ।

आज सोमबारदेखि भारतले परिषद् अध्यक्षको रुपमा कामकाज सुरु गर्दैछ । यस अवधिभर राष्ट्रसंघका लागि भारतीय राजदूत टीएस तिरिमूर्तिले मिडियालाई सम्बोधन गर्ने कार्यक्रम छ ।

सुुरक्षा परिषद्को अस्थायी सदस्यको रुपमा भारतको दुईवर्षे कार्यकाल जनवरी १, २०२१ मा सुरु भएको थियो ।