एमाले अध्यक्ष ओली वादी र प्रतिवादी रहेका दुवै मुद्दा प्रधानन्यायाधीशको इजलासमा

काठमाडौं । नेकपा एमालेका अध्यक्ष केपी शर्मा ओली वादी र प्रतिवादी भएका दुवै मुद्दामाथिको सुनुवाइ प्रधानन्यायाधीश चोलेन्द्र शमसेर आफैंले गर्ने भएका छन् ।

कर्णाली प्रदेशसभाका चार एमाले सांसदले दलको ह्वीप उल्लंघन गरेर माओवादी नेतृत्वको सरकारलाई विश्वासको मत दिएपछि गरेको कारवाहीका आधारमा पदमुक्त भएकामा प्रकाशमान सिंह राउतको एकल इजलासले अन्तरिम आदेशमार्फत पुनर्वहाली गरेको थियो ।

प्रकाश ज्वाला, नन्दसिंह बुढा, कुर्मराज शाही र अम्मर वहादुर थापामध्ये ज्वालाबाहेक तीन जना अहिले पनि कांग्रेस माओवादी गठबन्धनको सरकारमा मन्त्री छन् ।

दशौं राष्ट्रिय महाधिवेशन आयोजक कमिटीको कारवाही अवैधानिक रहेको भन्दै राउतको इजलासले चार सांसदलाई पुनर्वहाली गरेको थियो । त्यसका विरुद्ध अध्यक्ष ओली भ्याकेटको निवेदन लिएर अदालत गएका थिए ।

यसबीचमा एमालेले दशौं राष्ट्रिय महाधिवेशन आयोजक कमिटी भंग गरी केन्द्रीय कमिटीको दशौं बैठक बोलाइसकेको छ ।

यसअघि पटक असार ८ गते र २३ गतेको सुनुवाइले कुनै निर्णय दिएको थिएन । आज प्रधान न्यायाधीश चोलेन्द्र शमसेर जबरा र न्यायाधीश प्रकाश ढुंगानाको इजलासमा पहिलो नम्बरमै सो मुद्दाको सुनुवाइको पेशी तोकिएको छ ।

त्यस्तै अध्यक्ष ओलीसहित प्रदेशसभा सचिवालयलाई विपक्षी बनाएर नन्दस्रिंह बुढासहित एमालेका चार प्रदेश सांसदले दायर गरेको रिटमाथिको सुनुवाइ पनि सोही इजलासमा राखिएको छ ।