चीनमा थप ५५ जनामा कोभिड संक्रमण पुष्टि, ‘डेल्टा भेरिएन्ट’ फैलिँने क्रममा

वेइजिङ । चीनमा शनिबार ५५ जनामा कोभिड-१९संक्रमण पुष्टि भएको छ । पछिल्ला दिनहरूमा यहाँ कोभिड-१९ को नयाँ प्रजाती ‘डेल्टा भेरिएन्ट’ बाट संक्रमितको संख्यामा वृद्धि भइरहेको पाइएको छ ।

थप संक्रमितमध्ये ३० व्यक्तिमा स्थानीय रूपमा फैलिएको संक्रमण भेटिएको छ भने अन्य विदेशबाट आएका यात्रुमा भेटिएको हो । चिनियाँ राष्ट्रिय स्वास्थ्य आयोगका अनुसार जिआङ्सुमा १९, हुनानमा छ, चोङकिङमा दुई र लियोनिङ, फुजियान र सिचुआनमा एक एक जनामा संक्रमण पुष्टि भएको चीनको राष्ट्रिय सञ्चार माध्यम ‘चाइना डेली’ले जनाएको छ ।

चिनियाँ अधिकारीहरूले २५ संक्रमित विदेशबाट आउने व्यक्तिमा भेटिएको जनाएका छन् । यसमध्ये नौ युनानमा, आठ शाङ्घाईमा, तीन तियानजिनमा, झेजियाङ र फुजियानमा चार र एउटा ग्वाङ्गडोङमा संक्रमित रहेका छन् ।

ग्लोबल टाइम्सका अनुसार पूर्वी चीनको जियाङ्सु प्रान्तको राजधानी नानजिङको विमानस्थलबाट कोभिड–१९ संक्रमितका बिरामीहरू भेटिएका थिए । नानजिङमा जुलाई २० मा पहिलो संक्रमित भेटिएपछि अहिलेसम्म १८४ जनामा संक्रमण पुष्टि भएको छ ।