सहमतिको नाममा एमाले विवाद लामो समयसम्म रहनु हुँदैन : महासचिव पोखरेल – Nepal Press

सहमतिको नाममा एमाले विवाद लामो समयसम्म रहनु हुँदैन : महासचिव पोखरेल

काठमाडौं । नेकपा एमालेका महासचिव ईश्वर पोखरेलले सहमतिको नाममा पार्टीभित्रको विवाद अनन्तः कालसम्म रहन नहुने बताएका छन् ।

शुक्रबार पार्टी कार्यालयमा एमालेले आयोजना गरेको खीर खाने कार्यक्रममा पत्रकारहरूसँग कुरा गर्दै पोखरेलले भने, ‘हामी अधिकतम कोसिस गर्छौं । अधिकतम कोसिस गर्ने नाममा यो अनन्त कालसम्म अनिश्चिताको स्थिति रहनु हुँदैन ।’

पोखरेलले १० बुँदे सहमतिका आधारमा चाँडै निर्णय गरेर अघि बढ्ने बताए। ‘पार्टीका कार्यकता र शुचिन्तकहरूले पनि अनन्तकालसम्म यो रहनु हुँदैन भन्ने भावना प्रकट गर्नु भएको छ,’ उनले भने, ‘त्यस आधारमा हामी एउटा टुंगोमा चाँडै पुग्छौं । कार्यदलले सहमति गरेका १० बुँदे कार्यान्वयन गरेर जानुपर्छ, हाम्रो जोड त्यसमै छ ।’

उनले शनिबार बोलाइएको स्थायी कमिटीमा यसबारे थप निर्णय गरेर जाने बताए । पार्टी अध्यक्ष ओलीसमेत अब धेरै कुर्ने पक्षमा नरहेको पोखरेलको भनाइ छ । एमालेको स्थायी कमिटी बस्नुअघि ओली पक्षीय नेताहरूले वरिष्ठ नेता माधवकुमार नेपालसँग संवाद बढाएका छन् ।

शुक्रबार वरिष्ठ नेता माधवकुमार नेपाललाई भेट्न उपमहासचिव विष्णु पौडेल उनकै निवास कोटेश्वर पुगेका थिए । अध्यक्ष ओलीले भोलि स्थायी कमिटी बैठक बोलाउने तयारी गरिरहेका बेला संस्थापनतर्फका नेता पौडेल वरिष्ठ नेता नेपाललाई भेट्न गएका हुन् । यसअघि हिजो स्थायी कमिटी सदस्य सुवास नेम्वाङले पनि नेपाललाई भेटेका थिए ।


प्रतिक्रिया

Leave a Reply

Your email address will not be published. Required fields are marked *