९ महिनापछि मैदानमा फर्किए भान डाइक, लिभरपुल पराजित

काठमाडौं । लिभरपुलका डिफेन्डर भर्जिल भान डाइक ९ महिनापछि मैदान फर्किएका छन् । भान डाइक गत सिजन अक्टोबरमा एभर्टनविरुद्धको खेलमा जोर्डन पिकफोर्डसँग ठोकिएर गम्भीर घाइते भएका थिए ।

उनको दाइने घुँडामा ‘एसिएल इन्जुरी’ भएकाले आधाभन्दा धेरै सिजन गुमाउनु परेको थियो । भान डाइक ९ महिनापछि शुक्रबार राति भएको हेर्था बर्लिनसँगको मैत्रीपूर्ण खेलको ७० मिनेटमा न्याथानियल फिलिप्सलाई सब्सिट्युट गर्दै मैदान प्रवेश गरेका थिए ।

उनले अस्ट्रियाको टिरोल्स् टिभोली स्टेडियममा ११ हजार दर्शकसामु २१ मिनेट मैदानमा बिताए । भान डाइकले खेलपछि सामाजिक सञ्जालमा ट्वीट गर्दै ‘२८५ दिनपछि मैदान फर्किन पाउँदा खुशी छु । मलाई त्यो समयमा समर्थन गर्ने सबैप्रति कृतज्ञ छु ।’

इङ्लिस टोली लिभरपुल अस्ट्रियामा भएको मैत्रीपूर्ण खेलमा ४–२ गोलको नतिजामा पराजित भएको थियो । लिभरपुलले इङ्लिस प्रिमयर लिगको सिजन २०२१÷२२ को पहिलो खेल अगस्ट १४ मा नर्विच सिटीसँग खेल्ने छ । गत सिजन भान डाइकको अनुपस्थितिले लिभरपुललाई ठूलो घाटा भएको थियो ।

यद्यपि, मैत्रीपूर्ण खेलमा मैदान फर्किएसँगै भान डाइकले आगामी सिजन लिभरपुलको रक्षापंक्ति सम्हाल्ने निश्चित भएको छ ।