अन्तराष्ट्रिय अन्तरीक्ष केन्द्र ४५ मिनेट नासाको नियन्त्रण बाहिर, स्पेस दुर्घटना टर्‍यो

वासिङ्टन । अन्तर्राष्ट्रिय अन्तरीक्ष केन्द्र बिहीबार ठूलो दुर्घटनाबाट जोगिएको छ । स्पेस स्टेसन आफ्नो निर्धारित कक्षबाट ४५ मिनेट बाहिर गयो । त्यसपछि नासाको नियन्त्रण केन्द्रमा उपस्थित उडान टीमले पुनः नियन्त्रण स्थापित गर्दै कक्षमा ल्याइपुर्‍याए ।

नासाका अनुसार आधा डिग्री प्रति सेकेन्डको गतिमा स्पेस स्टेसन कक्षबाट बाहिरिँदै थियो । यो घटना रुसी ल्याब्रोटरी मोडल नाउकाको प्रविधिमा आएको खराबीले हुन गयो । नाउकालाई हालै स्पेस स्टेसनसँग जोडिएको थियो । यो यानको जेस्ट थ्रटर्स नामक प्रविधि आफै चल्न थालेको थियो । जसले गर्दा केन्द्र नासाको नियन्त्रणभन्दा बाहिर गयो । स्पेस स्टेसनमा ७ जना क्रु सदस्य छन् ।

यो घटना भएको केही बेरमै नासाले बोइङ–सीएसटी–१०० नामक स्टारलाइनर क्याप्सुलको प्रक्षेपणका लागि उल्टो गणना थालेको थियो । अब यसको लन्च ३ अगस्टमा हुनेछ । नासाका अनुसार अन्तराष्ट्रिय अन्तरीक्ष केन्द्रमा अहिले दुईजना रुसी, तीन अमेरिक, एक जापानी र एक फ्रान्सेली अन्तरीक्षयात्री छन् ।